lods

Lods, substantif. m. pluriel. Est ce que les Docteurs en droit appellent Laudimia, Car il vient de Laudo Latin, qui signifie je approuve, et comme le François dit je louë cela, c'est à dire, Je l'estime et tiens pour bon, qui est la cause qu'on l'escrit par d, estant lot et lots toute autre chose. On l'accouple ordinairement avec ce mot aussi pluriel ventes, disant lods et ventes, qui sont la redevance qu'un seigneur Censier a droict de prendre au feur du pris qu'un heritage estant en sa censive aura esté vendu, et ce pour autant qu'il en louë et approuve la vendition, pouvant si bon luy semble où droict de retenue a lieu, retenir à luy ledit heritage pour le pris qu'il a esté vendu, et en fruster l'acheteur, et est en vendition de roture ce qu'en vendition de fief, est relief, quint et requint, et le dit on tousjours en pluriel, lods et ventes, et point au nombre singulier, lod et vente.

Thresor de la langue françoyse. Jean Nicot.